Gilbert Auguste ki se yon atache k ap travay pou delegasyon Sid/Ayiti, mete men nan kòlèt epi souflete enfimyè Patricia Altema andedan dispansè Kafoujout la, yon lokalite ki nan komin Senjandisid.
Aksyon sa pase samdi 7 sektanm nan bò 10zè nan maten nan moman yon diskisyon ki te genyen ant atache a ak enfimyè a.
Pou kounye a, enfimyè a pote dosye a devan lajistis nan Okay.
N ap raple se pa premye fwa ajan k ap travay nan delegasyon Sid la ap komèt zak sa yo. Nan mwa jen pase a, chaje misyon nan delegasyon Sid la, Jackson Déna te agrese, bat epi blese Pierre Milord Jean nan mòn Briye sou wout pou monte Pòsali a. Nan dat 7 jiyè 2024 la, chaje misyon sa te kase tèt sitwayen Jean Gardy Percy andedan lekòl Senfranswadsal nan pawas Kafoujout. Nan dat 30 jiyè, menm Jackson sa, te souflete yon ajan UDMO andedan Pakè Okay la nan moman yon konvokasyon nan Pakè a.
Men jouk koulye a chaje misyon sa ap sikile libelibè ak sipò delegasyon Sid la malgre manda li gen dèyè l pou zak li poze yo.
Guy Numa
Pou Radyo Ayiti Egalite / RAE
